कर्णालीलाई प्रथामिकतामा राखेर १६औँ योजना बनाउन सुझाव
सुर्खेत / कर्णाली प्रदेशलाई प्राथमिकतामा राखेर १६औँ पञ्चवर्षीय योजना बनाउन स्थानीय सरकारहरूले सुझाव दिएका छन् ।
दुई दिनसम्म कर्णालीमा चलेको १६औँ योजनाको सुझाव सङ्कलन कार्यक्रममा सहभागी भएका स्थानीय सरकारका जनप्रतिनिधिले यस्तो सुझाव दिएका हुन् ।
राष्ट्रिय योजना आयोगले बनाउने १६औँ पञ्चवर्षीय योजनाका लागि सुझाव दिँदै स्थानीय सरकारका जनप्रतिनिधिले कर्णालीलाई सधैँ पछाडि पारिएको भन्दै आगामी पञ्चवर्षीय योजना कर्णालीलाई विशेष ‘फोकस’ गर्न सुझाव उनीहरूले दिएका हुन् ।
सुर्खेत भेरीगङ्गा नगरपालिकाका प्रमुख यज्ञप्रसाद ढकालले कर्णालीमा पर्यटकीय क्षेत्रको धेरै सम्भावना रहेको भन्दै यसलाई विशेष महत्व दिएर १६औँ योजनामा समावेश गर्न सुझाव दिइएको बताउनुभयो । उहाँले कर्णालीको जडीबुटी र यहाँको रैथाने बालीको प्रवर्द्धन हुने गरी प्रशोधन उद्योग स्थापना गर्ने गरी आगामी योजना बनाउन सुझाव दिइएको बताउनुभयो ।
पछिल्लो समय युवाहरू विदेशिने दर बढेको भन्दै उनीहरूलाई स्वदेशमै रोक्ने वातावरण बनाउने गरी योजना बनाउनुपर्नेलगायतका सुझाव स्थानीय सरकारहरूले राष्ट्रिय योजना आयोगलाई दिएका छन् ।
यसअघि कर्णाली प्रदेश सरकार, प्रदेशस्तरीय राजनीतिक दल, निजी क्षेत्र, प्रदेशका सबै जिल्ला समन्वय समितिबाट समेत सुझाव लिइएको थियो । उनीहरूले कर्णाली प्रदेशको सम्भावनालाई दृष्टिगत गरेर राष्ट्रिय योजना बनाउन कर्णाली प्रदेशबाट सुझाव दिएका थिए ।
सडक पूर्वाधार र अन्य संरचना नहुँदा कर्णालीको सम्भावना हुँदाहुँदै पनि अवसर लिन नसकिएको भन्दै आगामी योजनामा समावेश गर्न सुझाव कर्णालीबाट दिइएको छ । कर्णालीलगायत विशेष विकास कार्यक्रम सञ्चालन गर्नुपर्ने सुझाव आयोगलाई दिइएको हो ।्
सोह्रौँ योजनाका लागि कर्णाली प्रदेशमा सुझाव लिन आयोगका उपाध्यक्ष मीनबहादुर श्रेष्ठ, सदस्यसचिव तोयनारायण ज्ञवालीसहितको टोली गत मङ्गलबार सुर्खेत आइपुग्नुभएको थियो । यससँगै आयोगले सात प्रदेश सरकार र सात सय ५३ वटै स्थानीय सरकारसमेतको सहभागितामा १६औँ योजनाका लागि सुझाव लिने कार्य सकेको छ ।
