प्रचण्ड माधव समूहको स्थायी कमिटी बैठक सकियो

काठमाडौँ ः सत्तारुढ नेपाल कम्युनिष्ट पार्टी नेकपा खारेजीपछि एकै ठाउँमा उभिएर राजनीतिक अभ्यास गरेका पुष्पकमल दाहाल ‘प्रचण्ड’ र माधवकुमार नेपाल पक्षले अब फरकफरक बाटो हिड्ने निर्णय गरेका छन्।

अर्थात एमाले पृष्ठभूमिका नेताहरु एमालेमै फर्केर र माओवादी पृष्ठभूमिका नेताहरुले माओवादीमै रहेर ओलीविरुद्ध संघर्ष गर्ने भन्दै एकअर्कासँग विदाई भएका छन्।

नेता झलनाथ खनालले कानुन अनुसार पार्टी एक भएकोमा कानुनले अलग गराएका कारण अव एकै ठाउँमा रहने भन्दा पनि आआफ्नो घर फर्कन राम्रो हुने भएकाले आफूहरुले त्यसै निर्णय गरिएको हो।

सर्वोच्च अदालतले गरेको राजनीतिक फैसलाले फरक वातावरण सिर्जना गरेको र त्यसलाई आत्मसाथ गर्नु सबैको कर्तव्य भएको खनालले बताए। तर उनले भने,‘ सर्वोच्चले राजनीतिक निर्णय गरेको हामीलाई महशुस भएको छ। यसमा हाम्रो असहमति छ। अब आआफ्नै पार्टीमा रहेर वामपन्थी एकतालाई अघि बढाउन दृढतापूर्वक लाग्छौँ। ओलीविरुद्ध लड्ने छौँ।’ उनी बैठकमा ‘फेरि भेटौँला’ भन्दै बाहिरिएका थिए ।

स्थायी कमिटी सदस्य गणेश शाहले पनि त्यसको पुष्टी गरे। जे भएपनि अदालतको फैसला मान्नु पर्ने भएकाले अव एमाले पृष्ठभूमिका नेताहरु एमालेमै र माओवादी पृष्ठभूमिका नेताहरु माओवादीमै जाने र त्यहीँबाट संघर्ष गर्ने निर्णय गरेको जानकारी दिए। उनले भने,‘ यो हाम्रो चाहना होइन। हामीलाई बाध्य पारियो पूर्वपार्टीमा फर्कन। तर हामीली आफ्नो लडाईँ जसरी पनि जारी राख्ने छौँ।’

नेता रघुजी पन्तले पनि अदालतको फैसला मान्नु पर्ने आफ्नो कर्तव्य भएको बताए। उनले भने,‘हामीले सर्वोच्चको फैसला मान्दिन भन्न मिल्दैन। हामीले एमालेमा फर्कने निष्कर्ष निकालेका थियौँ र त्यसैअनुसार बैठकमा प्रस्तुत भएका हौँ।’

पूर्वएमालेमा वरिष्ठ नेताको हैसियतमा रहेका नेता नेपालका पक्षले स्थायी कमिटी बैठकमा जानुभन्दा पहिले राजधानीको एक होटलमा सोही निष्कर्ष निकालेको थियो।’ छलफलमा नेपाल पक्षका नेपालसहित, अष्टलक्ष्मी शाक्य, पन्त, युवराज ज्ञवाली, भीम आचार्य, बेदुराम भुसाल, घनश्याम भुसाल, योगेश भट्टराईलगायत सामेल थिए।

उनीहरुले सर्वोच्चको फैसलालाई अवमुल्यन गर्न नमिल्ने भएकाले आफूहरु एमालेमै फर्कनुपर्ने र पार्टी एकताका लागि प्रचण्डलाई पनि ओलीसँग समल्न आग्रह गर्नुपर्ने सुझाव दिएका थिए। २०७५ साल जेठ ३ गते नेकपा एमाले र माओवादी केन्द्रबीच एकता भएको थियो।

एकताभएको केही महिनामै पदीय भागबण्डाका कारण किचलो सुरु भएको नेकपाविरुद्ध ऋषिराम कट्टेलले आफ्नो पार्टीको नाम जुधेको भन्दै सर्वोच्च अदालतमा रिट हालेका थिए।

कट्टेलले रिट हालेको लामो समयपछि सर्वोच्चले उनको पक्षमा आइतबार मात्रै फैसला गरेको थियो। साथै नेकपा एमाले र माओवादी अलगअग भएको फैसलासमेत सर्वोच्च अदालतले गरेको थियो।

नेता नारायणकाजी श्रेष्ठले बैठकबाट सर्वोच्च अदालते गरेको फैसलालाई राजनीतिक फैसला भएको निष्कर्ष निकालेको बताए। उनले भने,‘ रिट निवेदकको मागदाबी भन्दा बाहिर गएर सर्वोच्च अदालतले फैसला गरेको छ। यसमा हाम्रो असहमति छ।’ तर फैसला सबैले मान्नु पर्ने उनको भनाई छ। उनले वामपन्थी एकता जारी राख्दै आआफ्नै ठाउँमा फर्कने निर्णय गरेको बताए।