नोट छपाइका लागि पुनः टेन्डर

काठमाडौं , नेपाल राष्ट्र बैंकले रू ५ सय दरका नोट डिजाइनिङ, छपाइ तथा आपूर्ति गर्न सार्वजनिक खरीद ऐनअनुसार पुनः अन्तरराष्ट्रिय स्तरको बोलपत्र आव्हान टेन्डर गरेको छ । आगामी जेठको पहिलो सातासम्म ५ सय दरका १९ करोड थान नोट डिजाइनिङ, छपाइ तथा आपूर्तिका लागि पुनः टेन्डर आव्हान गरेको हो । यसअघि रू ५, रू १० र रू ५ सय दरका नोटको बोलपत्र टेन्डर गरेकोमा ५ सय दरको टेन्डरमा प्राविधिक समस्या आइपरेको भन्दै मुद्रा व्यवस्थापन विभागले फेरि टेन्डर जारी गरेको हो । विभागका कार्यकारी निर्देशक विश्रुत थापाका अनुसार ५ सय दरका नोटको लागि राष्ट्र बैंकले चाहेजस्तो टेन्डर परेन । ‘यसैले फेरि बोलपत्र आव्हान गरेका छौं,’ उनले भने, ‘बैंकको भल्टमा ५ सय दरको नोट पर्याप्त भए पनि रिजर्भका लागि थप नोट छाप्न खोजिएको हो ।’