चीनले ल्यायो तीव्र गतिमा उड्ने जासूसी ड्रोन, अमेरिकी भूमिमा मार हान्न सक्ने क्षमता
काठमाडौं – चीनले सैन्य परेडमा सार्वजनिक गर्ने गरी अतिगोप्य सुपरसोनिक जासूसी ड्रोन उजागर गरेको छ ।
वुझेन–८ नामक उक्त ड्रोन अमेरिका नियन्त्रणको भूमि गुआम पुग्न सक्छ ।
चीनको राष्ट्रिय दिवस सैन्य परेडमा अभ्यासका क्रममा मानवरहित ड्रोन देखाएको चिनियाँ सञ्चारमाध्यमले जनाएका छन् ।
उक्त परेड चीनको सैन्यशक्तिको सबभन्दा ठूलो प्रदर्शन बन्न लागेको छ र त्यो असोज १४ गते हुँदैछ । कम्युनिस्ट शासन शुरू भएको ७० वर्षका उपलक्ष्यमा परेड गर्न लागिएको हो ।
त्यसमा देशको अत्याधुनिक हतियार प्रदर्शन गरिनेछ ।
दक्षिण चीन सागर वा पश्चिमी प्रशान्तमा लडाईं भएमा अमेरिकी सेनासँग लड्नका लागि बेइजिङले वुझेन–८ बनाएको हो ।
जनमुक्ति सेनाले यो खोजी ड्रोन केही समयदेखि प्रयोग गरिरहेको एक विज्ञले बताए ।
तर यसका बारेमा सार्वजनिक जानकारी एकदमै कम छ र चीनले यसको कुनै पनि तस्वीर सार्वजनिक गरेको छैन ।
ड्रोनको पहिलो परीक्षण सन् २०१५ मा गरिएको विश्वास छ । चाइना एभिएसन न्युजले एक समाचारमा यो ड्रोन केही घन्टाका लागि उडेको लेख्यो । यसको अर्थ यो लामो दूरीको जासूसी ड्रोन हुनुपर्छ ।
