विवादास्पद कम्पनीको निम्तामा चीन उडे ऊर्जा मन्त्री शाही
काठमाडौं– काम कुरो एकातिर कुम्लो बोकी ठिमीतर भन्ने नेपाली उखान त्यसै चलचल्तीमा आएको होइन रहेछ । हिउँद लाग्न थालेको छ, लोडसेडिङ हुने आशंका कायमै छ । तर, ऊर्जा मन्त्री महेन्द्रबहादुर शाहीलाई भने यी कुनै पनि कुराले अर्थ राखेको छैन ।
गत भदौ २४ गतेदेखि ३१ गतेसम्म ऊर्जा मन्त्री शाही विवादास्पद अष्ट्रेलियन कम्पनी स्मेकको निम्तो मान्न अष्ट्रेलिया पुगे । उनको भ्रमणको उद्देश्य के थियो र प्रयोजन के थियो भन्ने बारेमा आम मानिसलाई त के आफनै मन्त्रालयका सचिव तथा कर्मचारीलाई समेत जानकारी दिएनन् ।
प्रधानमन्त्री तथा मन्त्रिपरिषद् कार्यालयबाट पनि भ्रमण स्वीकृत गराएका थिएनन् उनले । आठ दिन अष्ट्रेलिया हराएर आएका मन्त्री शाही असोज १ गते मन्त्री क्वाटरमा नै बसे । २ गते मन्त्रालय आए र कर्णालीका स्थानिय बासिन्दासंग सामान्य भलाकुसारी गरे ।
भारतका लागि नेपालका राजदूत दिपकुमार उपाध्यायसँग एक घन्टा वार्ता गरे । त्यसअघि गृहमन्त्रालय पुगेर गृहमन्त्री जनार्दन शर्मासँग सम्वाद गरे । चार बजे संविधान दिवस मनाउन सभामुख ओनसरी घर्तीको आग्रहमा संसद भवन नयाँ बानेश्वर पुगे । २ गते बितीहाल्यो ।
मन्त्री शाही मंगलवार विहान एयर चाइनाको विमानबाट चीन उडेका छन् । उनको भ्रमणको प्रयोजन के हो भन्ने बारेमा उनको सचिवालय अनविज्ञता प्रकट गर्दछ । स्रोतकाअनुसार ऊर्जा मन्त्री शाही विद्युत् विकास विभागमा कार्यरत चिनियाँ कन्सल्ट्यान्टको निम्तो मान्न चीन उडेका हुन् ।
‘कति दिने भ्रमण हो र प्रयोजन के हो हामीलाई जानकारी छैन’ उनकै सचिवालयका एक अधिकारीले भने । पछिल्लो दिनमा आयोजना होल्ड गर्ने र काम नगर्ने प्रवृत्ति चिनियाँ ठेकेदारको रहेको छ ।
ढल्केबर सवस्टेशनको काम चिनियाँ ठेकेदारले गरिरहेको छैन । सो सवस्टेशन नसकिदा आगामी हिउँदमा लोडसेडिङ गर्नुपर्ने वाध्यता आउन सक्छ । मन्त्री शाहीलाई यी विषयमा कुनै मतलब नभएको जस्तो देखिन्छ ।
नेपाल विद्युत् प्राधिकरणले गर्ने नियमित काममा हस्तक्षेप गर्दै आएका मन्त्री शाही विवादास्पद परामर्शदाता र ठेकेदारलाई खुसी बनाउन चीनतर्फ लागेका हुन् । विभागका महानिर्देशक नविनराज सिंहले चाकडी बजाउँदै मन्त्री शाहीलाई चीन पठाएको बताइन्छ ।
