कर्णालीमा नेपाली कम्युनिस्ट पार्टीको हैसियत दोस्रोमै सीमित
सुर्खेत ः कर्णालीमा नेकपा (माओवादी केन्द्र) र नेकपा (एकीकृत समाजवादी) नेपाली कम्युनिस्ट पार्टीमा रूपान्तरण भएका छन् । केन्द्रमा माओवादीसहित दलहरूबिच एकता भएसँगै बुधबार कर्णाली प्रदेश सभाका यी दुई दलबिच एकता भएको हो । दुई दलबिच एकता भए पनि कर्णाली प्रदेश सभामा नवनिर्मित पार्टीको हैसियत भने साविकको माओवादी केन्द्रकै (दोस्रो स्थान) मा सीमित भएको छ ।
२०७९ को प्रदेश सभा निर्वाचनमा १३ सिट जित्दै माओवादी दोस्रो ठुलो दल बनेको थियो भने एकीकृत समाजवादीको १ सिट समानुपातिक मात्र थियो गणितीय रूपमा दुई दल मिल्दा सांसद सङ्ख्या १४ पुग्नुपर्ने हो, जसले १४ सांसद रहेको नेपाली कांग्रेससँग बराबरीको हैसियत राख्थ्यो । तर, बुधबार नै माओवादी संसदीय दलका नेता राजकुमार शर्माले राजीनामा दिएसँगै यो अङ्कगणित प्रभावित भएको छ । शर्माको सांसद पद गुम्ने निश्चित प्रायः रहेकाले एकीकृत समाजवादी मिसिँदा पनि पार्टीको कुल सांसद सङ्ख्या १३ मै सीमित छ ।
यसले गर्दा १४ सांसदसहित नेपाली कांग्रेस नै प्रदेश सभाको सबैभन्दा ठुलो दलको रूपमा यथावत् रहनेछ । कर्णाली प्रदेश सभामा १० सिटसहित नेकपा एमाले तेस्रो स्थानमा छ भने राष्ट्रिय प्रजातन्त्र पार्टी (राप्रपा) को १ सिट छ । यस्तै, एक जना स्वतन्त्र सांसद देवेन्द्रबहादुर शाही छन् । शाही राजनीतिक रूपमा नेपाली कांग्रेसमा प्रवेश गरिसके पनि प्रदेश सभा सचिवालयमा सोबारे औपचारिक जानकारी नआइसकेकाले उनलाई हालसम्म स्वतन्त्र सांसदकै हैसियतमा राखिएको सचिवालयले जनाएको छ ।
