ट्याक्टर दुर्घटनामा परि एकै घरका श्रीमान ,श्रीमाती सहित ५ जनाको मृत्यु

सुर्खेत , ५ पुस /रुकुम पश्चिमको आठबीसकोट नगरपालिकाको कोट च्यारीगाउँ खोला नजिकै ट्याक्टर दुर्घटना पाँचजनाको मृत्यु भएको छ ।

रुकुम पश्चिम आठबीसकोट नगरपालिका–१० पिरिकोट भित्री सडक खण्डको वडा नम्बर ८ स्थित घर्तीगाउँ जाँदै गरेको भूकम्प पीडितको जस्ता पाता बोकेको रा १ द १४ ट्याक्टर घुम्ती मोडन खोज्दा दुर्घटना भएको हो ।

दुर्घटनामा परी आठबीसकोट १० नाउलाका ४६ वर्षीय लोकबहादुर शाही, उनकी श्रीमती ४२ वर्षीया लुकी शाहीको मृत्यु भएको हो। यस्तै सोही वडाको डाँडा भन्ने स्थानका ४८ वर्षीय धनराम सार्की , ५२ वर्षीय भर्दर सार्की र ४७ वर्षीया निर्मला सार्कीको मृत्यु भएको छ । राती १० बजे बुधबार राति १० बजे उक्त घटना भएको आठबीसकोट इलाका प्रहरी कार्यालयले निकालेको विज्ञप्तिमा उल्लेख छ।

अन्य ९ जना घाइते भएका छन् । घाइतेहरुमा आठबीसकोट ८ का ४१ बर्षीय खडक बहादुर पुन , वडा नम्बर १० का ३८ वर्षीय रमेश सार्की , वडा नम्बर ८ का १४ बर्षीय दलबहादुर पुन , ५६ वर्षीय कुमार घर्ती , ३४ वर्षीया रमा गुरुङ , ५१ बर्षीय जगबीर सार्की , ३६ वर्षीय जयबहादुर घर्ती , ५८ बर्षीय मने सार्की , ४२ वर्षीय मदन पुन घाइते भएका छन् । घाइतेको नगर अस्पतालमा उपचार भइरहेको प्रहरीले जानकारी दिएको छ । उक्त ट्याक्टरका चालक आठबीसकोट ९ का २१ बर्षीय गोपाल विक अहिले फरार रहेको विज्ञप्तिमा उल्लेख गरिएको छ ।