सरकारले जाजरकोट र रुकुममा अस्थायी आवास बनाउन सेना-प्रहरी खटाउने
काठमाडौं ः सरकारले जाजरकोट भूकम्पपछि प्रभावित क्षेत्रहरूमा अस्थायी आवास निर्माणका लागि सेना प्रहरी तथा सुरक्षाकर्मी खटाउने निर्णय गरेको छ।
बुधवार बसेको मन्त्रिपरिषद् बैठकले भूकम्प प्रभावित जिल्ला जाजरकोटमा अस्थायी आवास निर्माण गर्ने काममा जिल्ला सुरक्षा समितिको सिफारिसको आधारमा नेपाली सेना, नेपाल प्रहरी र सशस्त्र प्रहरीलाई खटाउने निर्णय गरेको सरकारकी प्रवक्ता तथा सञ्चार तथा सूचना प्रविधिमन्त्री रेखा शर्माले बताइन्।
त्यस्तै बैठकले रिक्त राष्ट्रिय सभा सदस्य पदको लागि माघ ११ गते निर्वाचन गर्ने निर्णय गरेको हो। निर्वाचन आयोगको परामर्श बमोजिम सो दिन निर्वाचन गर्ने निर्णय गरिएको मन्त्री शर्माले जानकारी दिइन्।
त्यसैगरी बैठकले नेपाल इन्जिनियरिङ सेवातर्फ रिक्त सचिव पदमा सरिता दवाडीलाई बढुवा गर्ने निर्णय गरेको पनि उहाँले बताइन्।
मन्त्रिपरिषद्ले सैनिक विशेष अदालतको अध्यक्ष पदमा उच्च अदालत पाटनका न्यायाशीश लेखनाथ पौडेललाई तोक्ने निर्णय पनि गरेको छ।
