महामारीमा चुनावको झल्को

रुकुम पश्चिम– कोरोना महामारीकै बेला नेकपाले बाँफिकोट गाउँपालिकामा दुई पटक कांग्रेसका कार्यकर्तालाई पार्टी प्रवेश गरायो । यसै साता चौरजहारीमा पनि औपचारिक कार्यक्रम आयोजना गर्‍यो । कांग्रेसले पनि पार्टी प्रवेश, भेला तथा प्रचार कार्यक्रमलाई जिल्लाभरि जारी राखेको छ । साताअघि बाँफिकोट र आठबीसकोट नगरपालिकामा कांग्रेसले नेकपाका केही नेता कार्यकर्तालाई पार्टी प्रवेश गराएको थियो ।

कांग्रेसले आठबीसकोटमा मात्रै १ सय ५ जना पार्टी प्रवेश गरेको दाबी गरेको छ । कांग्रेस महाधिवेशन नजिकिएकाले विभिन्न गाउँमा क्रियाशील सदस्यता नवीकरण र वितरणका काम जारी छन् । यही क्रममा नेकपाबाट जिल्ला समन्वय समिति सदस्यमा निर्वाचित अमृत बोहरा, नेकपाका पुराना नेता नरबहादुर खड्कालगायत कांग्रेसमा प्रवेश गरेका हुन् ।

यस्ता भेलामा सामाजिक दूरी कायम गरिएको छैन । आपसमा हात मिलाउने तथा अबिर र टीका लगाइदिने गरिएको छ । यसले जोखिम झन् बढाएको आठबीसकोटका तेजबहादुर मल्लले बताए । ‘सबैलाई सचेत बनाउनुपर्ने दल नै उल्लंघनमा लागेका छन् । बरु पार्टीका नेताले कोरोनाबाट बच्न सचेतना फैलाउन जरुरी छ,’ उनले भने ।

पार्टी नेताहरूले भने सतर्कता अपनाएर कार्यक्रम गरिरहेको दाबी गरेका छन् । कांग्रेसका जिल्ला सचिव गोर्खबहादुर खत्रीले पार्टीका सबै काम सामाजिक दूरी कायम गरेर भएको बताए । ‘कोरोनालाई बेवास्ता गरेका छैनौं,’ उनले भने, ‘महाधिवेशन नजिकिएकाले सतर्कता अपनाएर एक महिनामा ६ वटै स्थानीय तहमा क्रियाशील सदस्यता वितरण र नवीकरणको काम सक्यौं ।’

नेकपाका अध्यक्ष गोपाल शर्माले मातहतका निकायलाई ठूला भेला र बैठक नगर्न निर्देशन जारी गरिएको बताए । ‘कोरोना रोकथाम तथा नियन्त्रणमा पार्टीको पनि भूमिका हुने भएकाले सरकारले तोकेका न्यूनतम मापदण्ड पालना गर्न आग्रह गरिएको छ,’ उनले भने, ‘बाहिर भनिएजस्तो ठूला भेला र सभाहरू कतै आयोजना गरिएका छैनन् ।’





error: Content is protected !!