अधिकृतलाई १० जना सुरक्षा गार्ड, जनताले पाएनन् योजनाको रकम र सामाजिक सुरक्षा भत्ता

रुपक कुलाल (इमान्दार खवर)

डोल्पा ः मुड्केचुला गाउँपालिकाले आजसम्म पनि सामाजिक सुरक्षा भत्ता वितरण हुन सकेको छैन । प्रमुख प्रशासकीय अधिकृत जीतबहादुर श्रेष्ठको डिलासुस्तीका कारण चालु अर्थिक बर्षको सामाजिक सुरक्षा भत्ता वितरण गर्न नसकिएको हो । दुइ महिना अघि गाउँपालिकाको कार्यालयमा हाजिर भएका प्रमुख प्रशासकीय अधिकृत श्रेष्ठ लामो समय विदामा बस्नु, सामाजिक सुरक्षा शीर्षकमा पर्याप्त रकम उपलब्ध नहुनु र गाउँपालिका अध्यक्ष अल्पमतमा पर्नु लगायतका कारणले ढिलाई भएको गाउँपालिका कार्यालयले जनाएको छ ।

स्यानीय जनताले टेलिफोन मार्फत दिएको जानकारी अनुसार प्रमुख प्रशासकीय अधिकृत गाउँपालिका अध्यक्षलाई असफल बनाउन लागि परेकाले समस्या आएको हो । ‘दुर्गममा काम गरेको भनेर आफ्नो नम्बर बढाउन डोल्पा पुगेका श्रेष्ठ उपाध्यक्ष पछि लागेर अध्यक्षलाई असफल बनाउन लाग्दा जनताले दुख पाए ।’ एक स्थानीयले नाम उल्लेख नगर्ने सर्तमा भने, ‘वडा कार्यालयका भवनहरु,टावर निर्माण भएर उद्घाटन भइसक्दा पनि भुक्तानी दिइएको छैन् । कर्मचारीले समेत तलब पाएका छैनन् । प्रमुख प्रशासकीय अधिकृत उपाध्यक्षको गोटी बन्दा समस्या आयो ।’

गाउँपालिकामा नेकपा एमाले पार्टीका कार्यकर्ताले ल्याएका फाइल बाहेक श्रेष्ठले अरु फाइल डस्विनमा फाल्ने गरेको स्थानीयहरुको भनाई छ । एमालेको काम गर्दैगर्दा अरु जनताले गुनासो गरेपछि एमालेले प्रमुख प्रशासकीय अधिकृतको सुरक्षाका लागि १० जना सुरक्षागार्डको व्यवस्था मिलाएको उनको भनाई छ ।

प्राप्त स्रोतका अनुसार अमरबहादुर शाही, राजबहादुर शाही, लोकेन्द्रबहादुर शाही, लालमन बिक लगाएत एमालेबाट निर्वाचित गाउँपालिका उपाध्यक्षका श्रीमान श्री रारा आधारभुत विद्यालय मुड्केचुला, ओक्टका प्रिन्सिपल लङ्कमान बुढा विद्यालयमा पढाउन छोडेर कार्यकारीको सुरक्षामा खटिएका छन् । त्यतिमात्र नभएर मुड्केचुला इलको वडा अध्यक्ष जगबहादुर रोकाया वडाको काम काज छोडेरै हाकिमको सुरक्षामा खटिएको स्थानीयले जनाएका छन् ।

उनलाई मुड्केचुलामा स्थानीय एमालेका नेताले ल्याएर आएकाले शुरूका दिनदेखिनै एमाले निकट भएर काम गरेका कारण समस्या आएको गाउँपालिका अध्यक्ष दत्त शाहीले बताए । ‘हामीले आर्थिक बर्षको सुरुमै सबैलाई भत्ता दिने विषयमा छलफल गरेका थियौँ । सामाजिक सुरक्षाको शीर्षकमा रकम अपुग भएर आएकाले केही समय रोकेर राखियो ।’ मोटिभेटसँगको कुराकानीमा अध्यक्ष शाहीले भने, ‘अपुग रकम माग गर्दासम्म केही ढिलाभयो । पछिल्लो समय प्रमुख प्रशासकीय अधिकृतज्यू एक महिना काठमाडौँ गएर बसेकाले थप डिलाइ भएको हो ।’

लकडाउन र निशेधाज्ञाका कारण सामाजिक सुरक्षा भत्ता वितरणमा ढिलाइ भएको गाउँपालिकाका प्रमुख प्रशासकीय अधिकृत श्रेष्ठले बताए । केही समयदेखि नेपाल बैंकको डोल्पा शाखा शिल भएकाले गाउँपालिकाको काममा अवरोध भएको उनको भनाई छ । ‘हिजोबाट बैंक खुलेको छ । अब प्रकृया पुर्याएर आगामी हप्ताबाट सामाजिक सुरक्षा भत्ता लगायत अन्य भुक्तानीका कामहरु गरिने छ ।’ उनले भने, ‘पहिलादेखि राजनीतिक रुपमा पनि यो गाउँपालिकामा समस्या रहेछ । मलाई अध्यक्षज्यूले पनि राजनीतिक पूर्वाग्रह राख्नुभयो । मिटिङ बसौं न भन्दा उहाँले मान्नु भएन ।

मलाई एमाले भनेर आरोप लगाउनुभयो । म आउन भन्दा पहिला नै सामाजिक सुरक्षा भत्ता वितरण गरेको भए भइहाल्थ्यो नी ? म आएको जम्मा दुई महिना त भयो । १ बर्षसम्म के हेर्नुभयो उहाँले ’ बर्षसम्म के गर्नुभयो ? भन्ने प्रश्नमा गाउँपालिका अध्यक्ष शाहीले सामाजिक सुरक्षाका लागि अपुरो रकम आएकाले केही समय ढिलाई भएको बताए । ‘सुरुमा संघीय सरकारले सामाजिक सुरक्षा शीर्षकमा ४० लाख रुपैयाँ मात्र पठायो ।

पालिकामा ५८ लाख सामाजिक सुरक्षामा खर्च हुन्छ । हामीलाई १८ लाखको कमी भयो । मेरो जोडबलले त्यो रकम ल्याएर एकमुष्ट वितरण गर्ने योजना अनुसार ढिलाई भएको हो । प्रमुख प्रशासकिय अधिकृत १ महिना काठमाडौँ नबसेको भए सबै समस्याको समाधान हुने थियो ।’