राष्ट्रपतिलाई ओलीको पत्र–हस्ताक्षरबारे हामी छानबिन गरिरहेका छौं, कुनै प्रक्रिया अघि नबढाइयोस्
‘पार्टी विधानले अरु दलको उम्मेदवारलाई समर्थन गर्ने अधिकार सांसदलाई दिएको छैन। तर केही सांसदले हस्ताक्षर गरेको सुनिएको छ। यसबारे हामीले छानबिन गरिरहेका छौं । छानबिन नहुँदासम्म कुनै प्रक्रिया अघि नबढाइयोस्’, ओलीले राष्ट्रपतिलाई पठाएको लिखित पत्रको आशय छ ।
उनले पार्टी हितविपरीत कोही सांसद गएको पाइए उनीहरु कारबाहीको भागिदार हुने भएकाले त्यस्तो हस्ताक्षरलाई राष्ट्रपतिले मान्यता दिन नमिल्ने समेत जिकिर गरेका छन् ।
प्रधानमन्त्रीका कानुनी सल्लाहकार बाबुराम दाहालले राष्ट्रपतिलाई एमाले संसदीय दलको नेताको हैसियतमा ओलीले पठाएको पत्रमा देउवाको पक्षमा हस्ताक्षर गर्ने सांसदहरुको हस्ताक्षर कुनै पनि हिसावले सही नभएको उल्लेख गरिएको बताए ।
संविधानको धारा ७६(५) बमोजिम राष्ट्रपतिले आह्वान गरेको समयसीमामा ओलीले पनि आफ्नो पक्षमा १५३ सांसद रहेको राष्ट्रपतिसमक्ष दावी पेश गरेका छन् । यस्तै विपक्षी गठबन्धनबाट देउवाले एमालेका माधव कुमार नेपाल पक्ष समेतको सहयोगमा १४९ सांसदको समर्थनसहित आफ्नो दावी पेश गरेको सन्दर्भमा ओलीले राष्ट्रपतिलाई पत्र पठाएका हुन् ।
